Tonga nijery ifotony ny fizotry ny fanamboaran-dalana ao amin’ny fokontany Ampasimbola, distrikan’i Soanierana Ivongo ny Goverinoran’ny faritra Analanjirofo, ny Dr Randriamanantena Marcellin, ny faran’ny herinandro teo. Hatreto, 23 isan-jaton’ny asa no vita. Lalana izay mirefy eo amin’ny 15 kilaometatra eo, mampitohy ny lalam-pirenena fahadimy, mitsofoka mihazo an’io fokontany ka ny dimy kilaometatra amin’izany no atao rarivato. Hahazo tombony betsaka amin’izany araka izany ny kaominina Ambinanisakana rehefa vita soa aman-tsara ny lalana, izay nampitaraina fatratra ireo mponina teo aloha. Marihana fa enim-bolana no fe-potoana hamitàna izany asa izany, ary ny Casef no miantsoroka ny fanantanterahana azy, ary ny orinasa AER kosa no miantony fanamboaran-dalana.
Tonga niaraka tamin’ny Governorana moa ireo solontenam-panjakana avy ao Soanierana Ivongo. « Sehatra iray hahafahana mampiroborobo ny tontolon’ny ambanivohitra izao ary hisaorana ny fitondram-panjakana tarihin’ny Filoha Andry Rajoelina » hoy ny ity tompon’andraikitra voalohan’ny faritra ity nandritra ny kabariny.
m.L
