Nitrangana lozam-pifamoivoizana namoizana ain’olona indray tetsy Andraharo, omaly naraina, tokony ho tamin’ny dimy ora, ka fiara kely iray « Hyundai i30 » no nanitsy ka nifatratra avy tao aoriana « camion semi-remorque » efa nijanona teo an-tsisin’ arabe. Lehilahy mpandeha iray nipetraka teo anoloana an-kavanan’ny mpamily no maty tsy tra-drano nosokirina tao anaty fiara, raha naratra mafy mbola manaraka fitsaboana any amin’ny hopitaly kosa ny saoferan’ity fiara kely tra-doza nitrongy kamiao mpitondra kontenera mpitatitra entana. Raha ny fanazavana azo tamin’ireo nanatri-maso ny loza, dia vokatry ny fandehanana mafy no niteraka ny loza.
Eric Manitrisa