Raha nilamindamina ny resaka asan-dahalo tany amin’iny distrikan’Anjozorobe iny, dia miaina anaty tebiteby hafa indray ireo mponina, indrindra fa ireo ao an-tampon-tanana, noho ny resaka tsy fandriam-pahalemana hatrany. Tato ho ato izay mantsy dia hita fa niha-nahazo vahana indray ny halatra môtô tao amin’ny kaominina ambonivohitra Anjozorobe. Tato anatin’ny andro vitsy dia efa tokantrano misimisy ihany no lasibatra vokatr’izay. Raha ny fanazavàna azo teo anivon’ny tobim-paritry ny zandary any an-toerana dia miisa roa izy ireo aloha hatreto no tonga nanao fitarainana tany, tao anatin’ny herinandro. Ny iray môtô « cross » nipetraka tao an-trano kanefa dia tafavoakan’ireo olon-dratsy soa aman-tsara. Ary ny iray, ny faran’ny herinandro teo, dia môtô rehefa nipetraka teo an-tokotany misy fefy mihidy.
« Efa eo am-panokafana ny fanadihadiana mahakasika izay tranga izay izahay », hoy ny tompon’andraikitry ny zandary any an-toerana. « Tamin’ilay tranga voalohany no efa nisy voasambotra ary natolotra ny Fampanoavana omaly » hoy ny fanazavàna. Olona telo ireto nosamborin’ny zandary ireto izay mpiambina tao amin’ilay trano nitoeran’ilay kodiaran-droa. Fantatra fa nadoboka am-ponja vonjimaika avokoa moa izy telo ireto. Mbola eo am-pikarohana izay mety ho namany hafa kosa ireo zandary. Tsiahivina fa efa toe-javatra efa nitranga teo aloha teo ity firongatry ny halatra môtô tao an-toerana ity, ary vitan’ireo olon-dratsy mihitsy aza tamin’izany naka kodiaran-droa an’ny tompon’andraiki-panjakana iray tao an-toerana. Saingy niatoato izy io ary dia izao miha-miverina izao indray. Marihana fa isan’ny fitaovam-pitaterana tena miasa any amin’iny distrika iny ny kodiaran-droa noho ny lalan-dratsy tsy ahafahan’ny fiara mihitsy.
m.L
