Saika isan’andro, mamoa-doza foana ny « moto scooter » eto an-dRenivohitra. Omaly naraina, tokony ho tamin’ny 10 ora, « moto jog 50 » iray nandeha nirimorimo mafy tamin’ny « sens interdit » hiakatra an’ Ankadifotsy iny no nandona ramatoa iray. Nianjera mafy be nitsirara tamin’ny tany ity renim-piakaviana, ka naratra mafy teo amin’ny lohany, ary mbola manaraka fitsaboana ao amin’ny « neurochirurgie ». Na dia nasain’ireo olona nanatri-maso ny loza nijanona ilay lehilahy nitondra moto mainty nahavanon-doza, izay nanao « Jean blouson grenat » sy « casque ABM », dia nirifatra nitsoaka nandositra. Raha ny fanazavana azo, nandeha teny an-tsisin-dàlana ilay ramatoa, satria feno fiara nijanona (lasa parking) tamin’ny toerana natokana ho an’ny mpandeha an-tongotra. Raha ny tati-baovao voaray farany tamin’ny fotoana nanoratana ny lahatsoratra, dia efa nametraka fitoriana teny amin’ny mpitandro filaminana ny fianakavian’ilay ramatoa niharam-boina, ka karohina fatratra amin’izao ilay mpitondra môtô nahavanon-doza.
Eric Manitrisa