Nitrangana vaky fasana indray teny amin’iny distrika Atsimondrano iny ny alatsinainy lasa teo. Fasana roa no fantatra fa indray lasibatr’ireo olon-dratsy mpangalatra taolam-paty, teo amin’ny toerana antsoina hoe Antsody, ao amin’ny kaominina Ankadivoribe. Taolambalona razana maromaro no very tamin’izany, ary ny iray tamin’ireo fasana vaky ireo aza, araka ny fampitam-baovao azo avy tamin’ny zandary dia tsy nisy afa-tsy ny lamba nifonosan’ireo razana sisa no navelan’ireo olon-dratsy. Lasany avokoa ny taolambalo rehetra tao anaty fasana. Io alatsinainy io, tokony ho tamin’ny efatra ora hariva no nisy nahatsikaritra fa mivoha ny varavaram-pasana tamin’ny fasana iray teny an-toerana. Nampandrenesina avy hatrany ny fokonolona sy ny tompon’andraikita isan-tsokajiny avy, niaraka tamin’ireo tompom-pasana. Tamin’izay no nahitàna fa fasana roa no indray nisy namaky. Hatreto raha ny loharanom-baovao hatrany dia mbola tsy voafaritra ny isan’ireo razana very tao anatin’ireo fasana ireo. Efa mandeha moa ny fanadihadiana ataon’ireo zandary avy ao amin’ny « poste avancé » Ankadivoribe. Fa ankoatra izay dia nitrangana vaky fasana ihany koa teny amin’iny faritra Masindray iny, omaly vao mangiran-dratsy. Razana am-polony maro ihany koa no very tao anatin’izany. Mbola mampametra-panontaniana, ary toa mijanona ho fanontaniana tsy misy valiny ny hoe, mankaiza ary iza no mandray ireny taolam-paty ireny. Tsy eto andrenivohitra irery mantsy fa na hatrany amin’ny faritra ihany koa.
m.L