Ity tranga ity dia toa milaza fa mihantsy ireo mpitandro ny filaminana mihitsy ny jiolahy any amin’iny faritra Manjakandriana sy ny manodidina iny. Ity toerana ity izay fantatra fa isan’ny hanaovan’ny zandary hetsika fampandrian-tany amin’izao fotoana izao. Tokantrano roa amina fokontany roa samihafa no indray voatafika ny alin’ny Alatsinainy teo tokony ho tamin’ny 09 ora sy 30 minitra. Araka ny loharanom-baovao, folo lahy nirongo basy lava sy zava-maranitra no nanatanteraka ny asa ratsy. Ny voalohany dia nitranga tao Ambiky ka naharatrana ny tompon-trano, izay novelesin’ireo jiolahy tamin’ny « bois rond ». Voaroba tamin’izany ny vola 300 000 ariary sy telefaonina izay hitan’ireo olon-dratsy tao an-trano. Tao Andriankely ny faharoa izay mpivarotra ny tompony. Very tamin’izany ny vola 11 000 000 ariary sy zava-pisotro dimy tavoahangy. Nidina teny an-toerana avy hatrany ny zandary avy ao Andriampamaky raha vao nandre izany ka nanao ny fanarahan-dia ireo jiolahy izay voalaza fa niakandrefana ny dian’ireto farany. Nanampy azy ireo zandary avy ao amin’ny borigadin’ny Sadabe sy ny avy ao Ambohimanarivo. Saingy, tsy nisy vokany izany fa mbola tafaporitsaka ihany ireo jiolahy.
T.M.