Nisehoana lozam-pifamoivoizana namoizana ain’olona indray teny amin’iny faritra Anosibe iny ny alatsinainy hariva lasa teo, tanatin’iny ora-mikija iny. Zazavavy kely valo taona no namoy ny ainy rehefa avy nofaohin’ny môtô, nandeha mafy nizotra niankandrefana iny. Teny an-dalana nitondra ilay zazavavy kely tany amin’ny toeram-pitsaboana anefa dia tsy hita tampoka teo ny nalehan’ilay olona nandona. « Handeha hiampita ity zanakay ity, no nirafarafa avy any ilay môtô”, hoy Atoa Tiana fianakavian’ity zazakely ity. Tokony ho tamin’ny efatra ora hariva teo no nitranga ity loza nampivarahontsana ny fianakaviana iray manontolo ity. Mponina eo amin’io toerana io izy ireo. “Tsy tazan’ilay mpitondra môtô mihitsy ity ankizy ity niampita”, hoy ny fanazavàna. Mafy dia mafy ny fifandonana ary nipitika mihitsy ilay ankizy rehefa voadona. “Angamba voa teo amin’ny lohany ilay zanakay fa avy hatrany dia tsy nahatsiaro tena izy”. Nikoropaka avy hatrany ireo olona akaiky an’ity zazavavikely ity, nitondra ity naratra tany amin’ny toeram-pitsaboana. “Nasainay nanaraka avy tao aoriana fotsiny ilay mpitondra môtô, hanaraka anay any amin’ny hôpitaly. Nisy olona, mponina teo akaiky teo nilaza fa hiaraka tamin’ilay nandona. Tany anefa dia tsy nipoitra intsony ary tsy hita tany nanjavona ireo olona ireo”, hoy ity raim-pianakaviana tafaresaka taminay ity. Noho ny ratra mafy nahazo ilay zaza kosa, dia tsy tana intsony ny ainy, io alatsinainy hariva io, tokony ho tany amin’ny fito ora tany ho any. Tsy hita intsony mihitsy ilay nahavanon-doza hatreto. Efa eny an-tanan’ny mpitandro filaminana ny raharaha, ary mandeha ny fikarohana ity farany.
m.L