Nisehoana halatr’omby tao amin’ny kaominina Ambatomiady distrikan’ Antanifotsy ny alin’ny alarobia 7 jolay lasa teo. Very tamin’izany ny omby vositra roa, saingy tafaverina tamin’ny tompony ihany taorian’ny fanarahan-dia. Azo lazaina mbola tsara vintana ihany ny fokonolona nampian’ny mpitandro filamianana tamin’ny fanarahan-dia fa ny ampitson’ny fanafihana dia hita velona soa aman-tsara ihany ny omby lasan’ireo mpagalatra. Navelan’ireto farany tao anaty ala antsoina hoe Antaolanolona ao amin’ny kaominina Andranofito ny omby roa lahy. Tsy vao sambany akory ny nisian’ity rainizavona ity ao amin’ny distrika Antanifotsy ao fa zary efa lasa andavan’andron’ny mponina mihitsy. Misy manao latsak’alina ny omby, tsy maka omby maro ny jiolahy fa roa na telo eo no alainy. Vonoiny tsy lavitry ny tanàna ny omby hakany hena, ka ambinambiny toy ny tongotra sy loha sisa avelany, dia toy izay hatrany. Tamin’ity indray mitoraka ity kosa, dia mbola azo velona ny omby, ireo mpangalatra kosa tsy hita ny nanjavonany.
Andry N