Nifanenjana indray ny pôlisy sy ny jiolahy teny amin’iny Avaratr’Antanimora iny omaly hariva. Vokany jiolahy roa no lavon’ny balan’ireo pôlisy ao amin’ny sampana miady amin’ny asan-jiolahy mahery vaika, na ny SAG. Nisahotaka avokoa ireo mponina teny amin’iny faritra Ampasanimalo, Avaratr’Antanimora sy Ambaranjana iny. Nirefodrefotra mantsy ny basy teny an-toerana, omaly hariva tokony ho tamin’ny fito ora tany ho any. Ny fanazavàna azo avy amin’ny mpitandro filaminana no nahafantarana fa nisy andian-jiolahy nikasa ny hanafika toerana iray teny an-toerana. Sendra ny nahay noho izy anefa izy ireo tamin’ity indray mitoraka ity : nifanena tamin’ny mpaka kitay, araka ny fiteny mahazatra. Efa fantatr’ireo mpitandro filaminana ity fikononkononana fanafihana ity, raha ny loharanom-baovao ka efa nandrasana fotsiny ry zalahy ireto. Efa-dahy izy ireo, samy mirongo basy avokoa. Velona avy hatrany ny fifanandrinana teo amin’ny roa tonta. Iretsy olon-dratsy mantsy, raha vao nahatazana ireo pôlisy, avy hatrany dia nitifitra sy nanao tari-dositra tany amin’iny faritra Ambaranjana iny. Teo anatrehan’izany tsy maintsy namaly tifitra ny avy aty amin’ireo mpanenjika. Roa tamin’ireo olon-dratsy no lavon’ireo mpitandro filaminana, tafaporitsaka kosa ireo roa ambiny. Latsaka teny an-tanan’ireto jiolahy maty ireto ny basy nentin’izy ireo, PA iray, araka ny fanazavàna azo hatrany. Mbola manao savahao ny manodidina hatreto ireo mpitandro filaminana, hirakorahana ireo olon-dratsy nitsoaka. Naterina teny amin’ny tranom-patin’ny Hjra kosa ireo voalaza fa jiolahy namoy ny ainy ireo.
m.L