Voasambotry ny polisy miasa ao amin’ny Fitaleavam-paritry ny Filaminam-bahoaka Vakinankaratra ny lehilahy miisa telo manodidina ny 21, 23 ary 25 taona, ny zoma lasa teo tany Antsirabe noho ny fivarotana fitaovam-piadiana mahery vaika. Fantatry ny polisy fa misy andian’olona nikasa hivarotra fitaovam-piadiana mahery vaika toy ny basy any amin’ny faritra Talata Andraikiba. Niara-nisalahy avy hatrany ireo mpitandro filaminana miasa any an-toerana tamin’ny fikarohana. Natao ny fanaraha-maso, napetraka ny paik’ady sy ny vela-pandrika ka lehilahy telo no sarona tamin’ny toerana kizokizo iray avaratr’i Talata/Andraikiba. Tratra ambodiomby teo am-pivarotana basy « carabine » izy ireo. Nentina avy hatrany eny amin’ny biraon’ny Fitaleavam-paritry ny Filaminam-bahoaka nanaovana fandihadiana.
Yv Sam
