Ny lefitry ny fibaikoana ny toby miarmaila ao Mandoto no namoy ny ainy, nandritra ny fifanandrinana tamin’ny dahalo, ny alahady lasa teo. Dahalo 17 no narahin-dia ary niafara tamin’ny fifampitifirana izany. Samy nisy lavo roa ny telo tonta : ny fokonolona nanampy tamin’ny fanarahan-dia, ny dahalo ary ny mpitandro ny filaminana. Naharitra adim-pamantaranandro roa ny fifampitifirana tao anaty kizo izay nitarika ny fahafatesan’ilay lehiben’ny miaramila. Tao anatin’izany ihany koa anefa no nahalavo dahalo fito izy sy ny ekipa nentiny. Tao anatin’izany fifanandrinana izany no nisy olon-tsotra telo voan’ny bala. Ny iray tamin’izy ireo no namoy ny ainy raha mba voavonjy kosa ny roa hafa. Midika izany rehetra izany, fa mitovy tsy misy valaka amin’ireny horonan-tsarimihetsika « commando » ireny ny zava-misy any amin’ny faritra amin’izao fotoana, mahakasika ny asan-dahalo. Saingy toa tsy misy akony firy eto an-drenivohitra noho ny halavirana. Nefa dia horohoro isan’alina no iainan’ny olona any ambanivolo any.
D.R
