Iray andro taorian’ny nisian’ny lozam-pifamovoizana, namoy ny ainy ilay tovovavy izay isan’ny voahitsakin’ny taxi-be tetsy Behoririka. Natao ny fomba rehetra hitazomana ny ainy saingy tsy tàna intsony izany. Raha tsiahivina dia olona dimy no indray nofaohin’ity taxi-be izay nilaza ho tapaka hisatra. Nitera-doza avy hatrany izany satria tao anatin’ny fotoana tena be olona teo Behoririka. Nandona kodiaran-droa izay nisisika aloha ilay fiara fitaterana ary nanitsaka olona indray avy eo. Marobe ny fanontaniana mipetraka rehefa mitranga ny lozam-pifamoivoizana toa izao : mba tomombana ve ny fitsirihina ara-teknika an’ireny fiara fitaterana ireny? Mbola mety hivezivezen’ny fiara marobe ve ny fotodrafitrasa sa terena fotsiny sisa noho ny tsy fisian’ny safidy? Ny kodiaran-droa ve mbola tokony hiray arabe amin’ny kodiarana efatra? Rehefa mbola tsy tomombana ny valin’izany rehetra izany dia mbola vatapaty mandehandeha hatrany aloha ny kodiaran-droa sy ny kodiaran’efatra izay mivezivezy eto amintsika, indrindra eto an-drenivohitra. Torak’izany koa, ireo olona mivezivezy eny amin’ny arabe dia mety iharan-doza amin’ny ora tsy ampoizina avokoa.
D.R
