Raha somary nangina ny resaka fanafihan-jiolahy nitam-piadiana sy ny halatra omby, any amin’ny kaominina ambanivohitra Anjiajia, distrikan’Ambatoboeny, faritra Boeny dia manomboka miverina indray ny asan-dahalo nahaverezana omby. Ny zoma hifoha sabotsy faha-19 septambra taona 2026 teo iny, tokony ho tamin’ny 02 ora maraina no nahalasanan’ireo olon-dratsy niisa telo ny omby roa tao am-bala, tany amin’ny fokontany Betanatanana, kaominina ambanivohitra Anjiajia.Tsy nahere ny halatra nisy ny olona teo amin’ny manodidina, eny fa na dia ny tompon’omby aza. Taitra kosa ny tao an-trano raha sendra nandeha nivoaka ny trano tsy nahatazana ny omby roa. Taorian’izay dia raikitra ny antso vonjy sy ny fanarahan-dia nataon’ireo vatan-dehilahy, ary ny zandary miasa ao Anjiajia tampon-tanàna. Ny angom-baovao hatrany no nahalalana, fa nony tonga teny an-tampokara ao Anavabe, fokontanin’Ampasitapaka, mbola any amin’ny kaominina ambanivohitra Anjiajia ihany, dia niverin-dalana ny mpitandro ny filaminana, saingy nanohy ny lalana tamin’ny fanarahan-dia ny vatan-dehilahy. Eto am-pamaranana ny lahatsoratra, raha ny fampitam-baovao voaray dia hitan’ireo mpanara-dia, tao atsinananan’ny tanànan’Ambalajanakomby, ato anatin’ny distrikan’i Maevatanàna ireo omby roa nangalarina, efa tsara fatotra anaty akata ny tolakandron’ny alahady faha-20 septambra taona 2026 teo. Tsy nisy tazana teo kosa ny jiolahy nitondra ny omby.
Ratantely
