Nitrangana lozam-pifamoivoizana indray tetsy By-pass, omaly hariva tamin’ny 3 ora latsaka kely. Kamiao iray nitondra simenitra no nivadibadika ka nifatratra teny amin’ny “dalle”. Voalaza fa noho ny fahavakisan’ny kodiarana teo aloha no nitarika ny loza. Vokany : voatsindrin’ireo gonin-tsimenitra ilay mpamily sy ny lehilahy iray niaraka taminy tao anatin’ilay kamiao. Naratra mafy izy ireo vokatr’izany. Etsy andaniny, nisy ihany koa ireo nanamarika fa ny vesatr’ireo gonin-tsimenitra nentin’ity fiara ity no tena nahatonga ilay kodiarany ho vaky. Ireo olona nanatri-maso ny loza no nifarimbona nanala ireo gonin-tsimenitra nanindry azy roa lahy ary nitondra an’ireto farany teny amin’ny hopitaly.
Niony H.