Nisy sary azon’ny mponina teny an-toerana. Izany dia sary dian-tongotra biby misy hoho lava telo. Vetivety dia nampisahotaka ny sain’ny olona ny zava-nisy, indrindra raha nisy nilaza fa maty ny akoho amam-borona sy ny biby fiompy hafa toy ny alika. Toa vao mainka nanamarina izany ny fidinan’ny mpiasam-panjakana ambony iray teny an-toerana, amin’ny maha-olon-tsotra azy, ary niara-nanamarina tamin’ny olona. Raha noheverina fa tsaho ny zava-nisy dia mainka koa toa nohamafisin’io olom-panjakana io. Samy manana ny filazany ny rehetra manoloana ny tranga. Ao no milaza fa ireny fosa ireny no mety ho mivezivezy ao an-tanàna. Izany anefa dia bibidia tsy fahita ety an-drenovohitra no koa efa mitady ho lany tamingana. Ho an’ny mpitantana ny tanàna indray dia tsy mitombina velively ny fisian’ny biby fa entina hanakorontanana saim-bahoaka fotsiny izany. Tsy voatery ho marina hatrany izay lazain’olona, eny fa na dia olom-panjakana aza, raha ny fanazavana avy amin’ity manam-pahefana ity. Ny azo heverina ho vahaolana izany dia ny fidinana an-tsehatry ny teknisiana ary manamarina tanteraka ny tena zava-misy mba hampilamina ny sain’ny olona. Dieny mbola tsy voafara ny dian-tongotra izay mety ho porofo dia tokony halefa ny fanadihadiana. Raha dian-tongotra napetrapetraka entina hanakorontanan sain’olona no valiny dia mendrika hosamborina izay tompon’antoka amin’izany.
D.R
