Anisan’ny mitondra faisana amin’ny resaka fankana an-keriny ny mponina any amin’ny distrikan’i Tsaratanàna iny an-kehitriny, hany ka lasa mampitebiteby ny olona any an-toerana ny zava-mitranga iainan’izy ireo manoloana izany. Raha ny fampitam-baovao voaray dia 16 andro aty aoriana vao votsotra, ireo olona efa-mianaka nalain’ny jiolahy an-keriny ny alin’ny faha-7 novambra taona 2024 lasa teo iny, tokony tamin’ny 8 ora latsaka 15 minitra tany ho any. Tao amin’ny tanàna atao hoe Antevamarina, fokontanin’Ambohimahavelona, kaominina ambanivohitra Ambakireny, any amin’ny disitrikan’i Tsaratanàna no nisehoan’ny asa ratsy nataon’ireo malaso niisa 12 lahy nitondra basim-borona sy ny fitaovam-piadiana mahery vaika tamin’izany. Ny angom-baovao hatrany no nahalalana fa ny 24 novambra taona 2024 lasa teo, tokony tamin’ny valo ora alina no nahazo loharanom-baovao marim-pototra ireo Zandary manao « savao, » ao amin’ny tanàna atao hoe: Antsapanan’i Betenina, fokontany ao ihany , kaominina ambanivohitra Ambakireny, fa votsotra ny alin’ny 23 novambra taona 2024 lasa teo, tokony tamin’ny sivy ora, ireo olona nalaina an-keriny, ka tao amin’ny toerana manamorana ny reniranon’i Betsiboka, akaikin’ny tanàna atao hoe: Amboniakondro, any amin’ny disitrikan’Ankazobe iny. Rehefa nataon’ny mpitandro ny filaminana kosa ny fanadihadiana tamin’ireo niharam-boina dia olona tsy misy fatantr’ireo mihitsy no nanao ny fakana an-keriny an’izy ireo. Efa nomena ny fianakaviany moa ireto farany taorian’ny fankana am-bava natao. Marihina ihany kosa fa tsy nisy fifampiraharahana natao tamin’ireo malaso ho takalon’ny famotsorana raha ny vaovao voaray farany hatrany. Mitohy hatrany kosa ny fikarohana ataon’ny Zandary an’ireo jiolahy nanatanteraka ny asa ratsy tamin’ireo efa-mianakana nalain’ny an-keriny.
Ratantely
