Azo tanterahina tsara ny handrakotra ala an’i Madagasikara, manana karazan-kazo maro haingam-pitombo tsy hita afa-tsy eto rahateo isika ary malalaka ny velaran-tany mbola azo volena. Velaran-tany 11 hektara no novolena zanakazo tao Andekobe, kaominina Betafo, nandritra ny fanokafana ny taom-pambolena ho an’ny faritra Vakinankaratra. Niara-dia tamin’ny Ministeran’ny tontolo iainana ny coeur forêt izay miezaka mamboly hazo eto Vakinankaratra. Maro rahateo ny fiaraha-miasa efa nahomby niarahana tamin’ny « coeur de forêt ». Nambaran-dRtoa Ratefason Tojotsara, talem-paritry ny tontolo iainana eto Vakinankaratra, fa efa misy 2 metatra ankehitriny ny halavan’ny kininim-potsy novelena ary aman’hektara ny tany feno ala midoroboka. Hentitra ny fepetra norasina amin’ny fanaraha-maso sy fikojakojana ny tany novolena hazo, raha ny fanazavan’ny tale hatrany. Isan’izany ny fametrahana takela-by mandrara ny fidirana amin’ny faritra, indrindra fa ny fidiran’ny omby, ny fanaovana aro afo ary fanadiovana ny manodidina ny lavaka nambolena hazo. Tsy natao latsa-danja ihany koa ny fanosohana ireo hazo maty. Izany no natao mba hampahomby ny fambolen-kazo izay efa hita taratra sahady ny fivoarany tao anatin’ny roa taona. Tanjon’ny foibem-paritry ny tontolo iainana sy fandrosoana lovain-jafy eto Vakinankaratra ny hemetraka « pepinière », na tanin-janakazo, isaky ny kaominina mba hanamorana ny fambolen-kazo. Tetikasa izay hiarahana amin’ny faritra sy ny « graine de vie » ary indrindra angatahana tohana avy amin’ireo orinasa maro eto Antsirabe ny fanatanterahana izany.
Andry N.
