Nanjavona ny fanafody, torak’izany ihany ny saofera sy ny kamiao nentiny. Niainga tany Toliara io fanafody iray kaontenera io ary hatramin’izao dia tsy hita izay nanjavonany, sivy andro taty aoriana. Nanazava ny zandary etsy Fiadanana fa na nisy aza ny fisavàna nataon’ireo tetsy Ambohipo, na nisy ihany koa aza ny fakàna ireo fanafody marobe izay tsy ara-dalàna, dia voaporofon’ny fanadihadian’izy ireo fa tsy tao anatin’ireo entana very aloha ireo. Fanafody 21 gony izay tsy misy taratasy ara-dalàna no nataon’ny zandary “saisie” ary notazomina nanokafana fanadihadiana ihany koa ny tompon’ny toerana nahitàna an’izany. Olona roa izy ireo raha araka ny fanazavan’ny zandary hatrany. Mahakasika ny fivarotana fanafody tsy ara-dalàna mitranga etsy Ambohipo sy ny manodidina kosa indray dia nanazava ny mpitandro ny filaminana fa mbola tsy nisy aloha ny fitarainana mahakasika an’izany, dikany dia tsy mbola misy ny fepetra noraisina. Amin’ny lafiny iray izany dia tazanim-potsiny aloha ny varotra tsy ara-dalàna mitranga. Ny tena olana dia tsy fantatra mazava izay niavian’ny fanafody amidy eny an-toerana kanefa resaka fahasalamana no voakasika…
D.R
