Nivezivezy teny an-toerana ny tompon’andraikitry ny kaominina; izay narahin’ny polisy mba hampitandrina ireo olona nametraka fiara an-tsisin-dàlana, amin’ny ilany havia. Tsy nisy nanohitra ilay endrika fanarahan-dalàna ny olona, saingy samy nametra-panontaniana kosa ny amin’ny toerana hasiana ireo fiara indray. Tsy voatery hanana « garage » mantsy ny tsirairay ary vitsy rahateo ny trano malagasy izay manana izany rafitra izany. Dikany, tsy maintsy eny an-tsisin-dàlana avokoa ny hametrahana ny fiara. Mazava fa tsy azo ihodivirana ny famerenana amin’ny laoniny ny tanànan’Antananarivo, saingy mba tokony hisy fotodrafitrasa mifanaraka amin’izany aloha vao tonga amin’ny fandraisana fanapahan-kevitra. Dia aiza izany izao no ametrahan’ny tompon-tanàna ny fiara ? Mipetraka ny fanontaniana ary andrasana amin’ny kaominina ny valiny.
D.R
