Ankoatry ny fitaovam-piadiana sy zava-maranitra dia isan’ny fitaovana entin’ireo olon-dratsy manao ny asa ratsiny ihany koa ny tsipoapoaka. Tra-tehaka teny amin’ny jiolahy iray, voasambotry ny zandary avy ao amin’ny tobim-paritra Fenoarivo, ny voalohan’ny volana teo. Nitrangana fanafihana mitam-piadiana tao Fidasiana, Antsahadinta, tamin’io fotoana io. Fianakaviana iray avy nanao famadihan-drazana no voalaza fa saika notafihan’ny jiolahy efa-dahy mirongo fitaovam-piadiana sy ity tsipoapoaka ity. Raha ny fanazavana nentin’ny zandary dia ankevitry ny vola « kao-drazana » azon’ireto fianakaviana ireto no tena nokendren’ireo olon-dratsy tamin’io fotoana io. Vantany vao nigadona teo an-toerana fotsiny anefa ireto andian-jiolahy ireto dia efa nihetsika ny zandary tamin’ireo zana-tobi-paritra manodidina, ny teny Vontovorona sy ny teny Ampahitrosy. Voahodidina ireto farany ary raikitra ny fanarahan-dia sy ny fanenjehana nataon’ireto farany, niaraka tamin’ny fokonolona teo an-toerana. Tsy ela dia azo sambo-belona ny iray tamin’ireo mpanafika ary efa saika tsy namelan’ireo mponina raha tsy atao fitsaram-bahoaka. Efa naratra vokatr’izay daroka sy vono nataon’ireo fokonolona izay mihitsy moa ity olon-dratsy ity ary saika niafara tamin’ny famoizany ny ainy, raha tsy niditra an-tsehatra nanakana izany avy hatrany ireto mpitandro filaminana. Tamin’ny fisavàna azy, hoy hatrany ny vaovao no nahitàna ireto tsipoapoaka ireto tany aminy. Efa natolotra ny Fampanoavana ity olon-dratsy ity ary nadoboka am-ponja vonjimaika etsy Antanimora, miandry ny fotoam-pitsaràna azy. Mbola mandeha kosa ny fikarohana ireo namany any an-toerana, raha ny fanazavana azo hatrany.
m.L
