Omaly vao maraim-be, notafihan-jiolahy ny tranona mpandraharaha iray, mpanangom-bokatra tany Maromena Imerintsiatosika. Lasa tamin’izany ny vola 3 tapitrisa ariary mahery. Ankoatra ireo ny fakana izay entana sarobidy toy ny vata fahitalavitra sy finday. Araka ny fitantarana voaray, nitondra fitaovam-piadiana toy ny basim-borona izy ireo ary niditra an-keriny tao an-tranon’ilay mpandraharaha. Raikitra ny fandrahonana sy ny fitakiana ny volabe. Efa toy ny mahafantatra ny fisian’ny vola ireto olon-dratsy. Teo anoloan’ny fitaovam-piadiana sy ny fandrahonana, nipotsaka ny vola an-tapitrisany. Soa ihany fa tsy namono ireto jiolahy efa lian-drà. Tao anatin’ny fotoana fohy izany rehetra izany, ary nitsoaka ireo avy eo. Niantso vonjy ny niharam-boina, ka tonga tany an-toerana ny mpitandro filaminana. Nanokatra ny fanadihadiana ny zandary avy ao Imerintsiatosika. Mandeha araka izany ny fikarohana ireo olon-dratsy. Tsy mbola nisy voasambotra aloha hatreto.
D.R
