Ny mpiambina aloha no norahonana voalohany. Tsy fandrahonana am-bava fotsiny fa avy hatrany dia basy sy antsy. Rehefa tsy afa-nanohitra io farany dia nalalaka amin’izay ny lalana niditra tao anatin’ny trano. Sady voadaroka ny olona no naratra. Lasa ny vola izay mitentina 10 tapitrisa ariary sy ny finday telo izay hitan’ireo olon-dratsy. Vita izay dia nitsoaka amin’izay izy ireo. Soa fa mba nisy nahavita nampandre ny mpitandro ny filaminana ary nanomboka teo ny fanenjehana. Ny alin’iny ihany dia efa raikitra ny hazalambo nataon’ny zandary avy etsy Ankadindravola. Nahitam-bokany izany satria nisy iray voasambotra tamin’ireo jiolahy. Nitohy hatrany ny fanadihadiana ary voasambotra ny olona valo rehefa nalaina am-bavany ilay jiolahy. « Nandritra ny fanadihadiana azy ireo no nahafantarana fa herinandro maro no nanomanana ity asa fanafihana ity » raha araka ny fanazavan’ny zandary. Midika izany fa tena manara-maso sy mitsikilo ny olon-dratsy ary mandinika ny fotoana hanatontosana ny fanafihana. Amin’ity raharaha ity dia mbola misy olon-kafa izay karohina.
D.R
