Omaly no namoy ny ainy tao amin’ny hôpitaly miaramila Soavinandriana ny zandary iray, izay fantatra fa niharan’ny vono avy tamin’ny rahalahiny am-piadiana, miaramila iray tetsy amin’ny toby iray tetsy Ivato. Ny alin’ny zoma lasa teo no nisy fifamaliana teo amin’izy roalahy ireto, araka ny angom-baovao azo. Izy ireo izay samy mpiandry raharaha tao amin’io toby miaramila io. Tsy vitan’ny resaka fifamaliana ara-bava intsony anefa ny zava-nisy fa niafara tamin’ny fikasihan-tanana mihitsy. Nodarodarohan’ilay miaramila tamin’ny « baton » ity zandary ary voa teo amin’ny faritry ny lohany. Daroka isan-karazany mihitsy izay niteraka ratra mafy tamin’ny karan-dohany. Nandriaka ny rà ary tsy nahatsiaro tena intsony ilay zandary, izay voatery nentina nihazo avy hatrany ny hôpitaly. Taorian’ny fitsaboana isan-kazarany moa dia izao tsy tana izao intsony ny ainy.
Nandray andraikitra mahakasika ity tranga ity ireto tompon’andraikitra isan-tokony sy ny lehiben’ity miaramila nahavanon-doza ity. Efa nosokafana ihany koa ny fanadihadiana mahakasika izany eo anivon’ny fitaleavana miadidy ny fikarohana heloka (DPJ) eo anivon’ny zandary.
m.L
