Jiolahy efatra rain-dahiny nokarohina efa ela, izay malaza ratsy amin’ny fanafihana mitam-piadiana, vono olona, fanendahana, ary vaky trano, izay nampiaikaika ny mponina maro tao Mahajanga, indrindra ny ao amin’ny Fokontany Tsararano Ambony, Tsararano Nosikely, Ambalavola, Fiofio, . . . no saron’ny polisy, afak’omaly, niaraka tamin’ny entana nangalariny sy ny vehivavy iray nampiantrano azy ireo teny amin’ny Cambil Port. Raha ny loharanom-baovao akaiky ny mpitandro filaminana, dia nandroba lehilahy iray nitondra moto teny amin’ny bizo Fitim i Tsôlô sy ny namany, ny 8 jona teo. Voatsindrona antsy ilay rangahy tompon’ny moto ka naratra mafy. Tadidin’ity raim-pianakaviana voatafika ny endriky ny iray tamin’ireo jiolahy, ka nanomboka teo ny hazalambo tamin’ny fikarohana an’ireo olon-dratsy. Raha ny fanazavana azo, dia gadralava sady mpamerin-keloka tsy mety fay i Tsôlô lehiben’ireto jiolahy, raha misy mbola tsy ampy taona kosa ny ekipany miara-mandroba aminy. Raha vao fantatr’ ireo olona lasibatra fa voasambotra ireto jiolahy ikoizana, dia nanao tohi-vakana sy nirarakopana ny fitoriana voarain’ny Polisy, ankoatry ny dosie telo efa miandry sy nanenjehana ary nikarohana an’ireto jiolahy hatramin’izay.
Eric Manitrisa
