Vao avy nahavita ny asa ratsiny ranamana dia ny handeha hitsoaka haingana hiala tao an-tanana no mby tao an-tsainy. Teny ambony taxi-brousse ingahirainy no nopaingorin’ny zandary mora foana. Tranga niseho tetsy amin’ny fokontany Tsarahonenana, ao amin’ny kaominin’i Mahitsy ny alin’ny zoma hifoha sabotsy lasa teo.
Araka ny fampitam-baovao nalefan’ny zandary dia lehilahy iray no voasambotry ny zandary mpanao sakana teny amin’iny lalam-pirenena fahefatra iny, ny andron’ny zoma hifoha sabotsy teo, tokony ho tamin’ny roa ora maraina tany ho any. Nilonjehitra entana isan-karazany ity lehilahy ity, izay efa tao anaty taxi-brousse, handeha hiakatra aty an-drenivohitra no tsikaritr’ireo mpitandro filaminana. Nahitàna kojakojan-tokatrano isan-karazany ireo entany, izay tsy voavaliny mazava ny fiaviany. Rehefa nofotopotorana anefa dia fantatra ihany fa entana halatra azony tao amina tokatrano iray teny an-toerana izy ireo. Ny lehilahy, izay araka ny tati-baovaon’ny zandary hatrany dia efa mpamaky trano hikoizana eny amin’iny faritra Mahitsy sy ny manodidina iny. Efa tsy zoviana amin’ireo zandary ihany koa satria dia efa mpamerin-keloka. Nentina niverina nihazo ny biraon’ny zandary moa ranamana ary notanana natao andrimaso ho amin’ny famotorana azy, nialohan’ny hanolorana azy indray eny anivon’ny Fampanoavana.
m.L
