« Nandrahona ny fianakaviana anefa ireto jiolahy ny hamerina ireto mpitandro filaminana fa raha tsy izany dia ho vonoiny ireto olona nentiny …»
Manjaka tanteraka ankehitriny ity resaka fakàna an-keriny olona ity ataon’ny dahalo ity, rehefa tapin-dalan-kaleha tamin’ny halatr’omby izy ireo. Tany amin’iny faritra Melaky iny indray, tao amin’ny distrikan’i Maintirano dia olona miisa efatra no nalain’ireo dahalo an-keriny tao amin’ny fokontanin’i Bemena, kaominina Andrea, ny faran’ny herinandro teo. Niditra an-tsehatra avy hatrany ireo mpitandro filaminana. Araka ny fampitam-baovao azo dia ny zoma tokony ho tamin’ny roa ora tolakandro teo no nosakanan’ireo olon-dratsy tao avaratry ny tananan’i Bemena ireto olona maromaro niaraka tafara-dalana. Andian-jiolahy nirongo fiadiana ireto farany ka tsy afa-nanoatra ireto lasibatra ireto. Tsy nisy alaharo alaharo fa avy hatrany dia nalain’izy ireo an-keriny ny sasany tamin’ireo olona ireto raha navelany nanohy ny diany ny hafa. Ireto farany no avy hatrany dia nampandre ny mpitandro filaminana tany an-toerana.
Nandray an-tanana avy hatrany ny raharaha ireo mpitandro filaminana tany an-toerana, nahitàna ny zandary, ny miaramila ary ny pôlisy, nametraka paik’ady ny amin’ny fanarahan-dia sy ny famonjena ireo olona lasa an-keriny. Nisy sakana eraky ny lalana ary nohodidinina ny alan’Analakinapa, izay fantatra fa nitondran’ireo olon-dratsy ireo olona nalain’izy ireo. Fantatr’ireo olon-dratsy tsara fa efa manaraka azy ireo, ny mpitandro filaminana ka nandefa fandrahonana tamin’ireo fianakavian’ireo olona teny am-pelan-tanany izy ireo, saingy tsy nampihemotra ireo mpanenjika. Nandritra ny roa andro ny fanarahan-dia ary ny marain’ny alahady teo no votsotra ny ankizivavy iray 15 taona. Ity farany no nahalalana fa mbola misy olona hafa miisa telo teny am-pelan-tanan’ireo olon-dratsy. Nitohy hatrany araka izany ny fanarahan-dia, ka tsy ela fa ny tolakandron’io andro io ihany dia votsotra ihany koa ireo telo ambiny. Avotra soa aman-tsara, tsy misy nisy nanombinana ireto olona lasa an-keriny ireto, raha ny tati-baovao hatrany.
Marihana fa nametraka paik’ady vaovao ireo mpitandro filaminana hiadiana amin’ity resaka fakàna an-keriny eny ambanivohitra ity. Rehefa avotra soa aman-tsara ireto lasibatra dia hiroso amin’ny hetsika famongorana ireo mpanao ratsy izy ireo, hoy ny vaovao.
m.L
