Asa tokoa raha hoe akaiky ny fety dia manao izay azony atao avokoa ireo olon-dratsy, manao izay tratry ny heriny amin’ny ratsy ataony. Araka ny fampitam-baovao avy amin’ny pôlisim-pirenena dia fantatra izao fa misy andian’olona indray, mivezivezy eto an-drenivohitra, misandoka ho mpitandro filaminana. Misoloky ary tonga hatrany amin’ny fanendahana olona mihitsy izany. Misy fomba roa ataon’izy ireo, hoy hatrany ny loharanom-baovao dia « na manakana taxi izy ireo na misambotra olona amin’ny fomba tsy ara-dalàna, manararaotra ary manendaka nony avy eo ». Na ihany koa, miditra anaty taxi-be, ary misava ankitsirano ny entan’ireo mpandeha sy maka izay zavatra sarobidy ao anatin’izany. Tsara ho fantatry ny maro, hoy hatrany ity fampitam-baovao ity fa « ny mpitandro filaminana ara-dalàna rehetra dia tokony hanana « badge » eny ambozonany, misy ny mombamomba azy rehetra, ny sampana misy na koa ny kaomisaria hiasàny. Faharoa manaraka izay, hoy hatrany ny fampitam-baovao dia tsy manan-jo velively hisava na haka zavatra anaty pôketran’olona izy ireo ». Eo anatrehan’izany, dia miangavy fiaraha-miasa amin’ny tsirairay ny eo anivon’ny pôlisim-pirenena raha sendra tranga toa izany, na olona mampiahiahy, mba hampilaza azy ireo avy hatrany amin’ireto laharan’ny kaomisaria ireto : Analakely: 034 05 998 28, Ambohijatovo: 034 05 517 28, Antaninandro: 034 05 517 29/034 05 998 32, Isotry: 034 05 517 30, Mahamasina: 034 05 998 36/034 07 517 16, Ambohimanarina: 034 05 517 12/034 05 998 38, 67Ha: 034 05 517 13/034 05 998 40, Analamahitsy: 034 05 517 14/ 034 05 998 42.
m.L
