Tato ho ato, raha ny fampitam-baovao voaray, dia mitombo isa ireo zaza very sy tsy ampy taona mitsoaka ny tokantranon’ny Ray aman-dreniny any amin’ny tapany Avaratry ny nosy iny. Ary mahoraka indray ankehitriny ny hala-jaza any amin’ny Distrikan’ Ambilobe sy ao Sambava. Ankizivavy 13 taona, izay mpianatra ao amin’ny Epp Sambava-Centre, kilasy T4 (8ème) no tsy hita popoka efa ho herinandro, ary tsy fantatra na maty na velona amin’izao. Ny harivan’ny alarobia 9 mey lasa teo, tokony ho tamin’ny dimy ora, no niala ny tokantranon-dRay aman-dreniny, tao amin’ny fokontany Ambodisatrana I, ambadiky ny kianja filalaovam-baolina, Razanabola Manantena Sisiana, ka mbola tsy hita mandrake androany, na dia efa nokarohin’ny mpitandro filaminana sy ny fianakaviany fatratra hatraiza hatraiza aza ity « tsaiky hely » ity, hoy ny vaovao.
Eric Manitrisa
