Nandriaka ny rà tao amin’ny tanànan’Ambodimanga, ao amin’ny fokontany Ambodisambalahy, any amin’iny distrikan’i Sambava iny, ny 23 jona lasa teo. Lehilahy iray no maty nihoson-drà tao an-tranony, trobaky ny bala teo amin’ny tratrany. Azo heverina fa maty nitifi-tena ity lehilahy ity, satria araka ny fampitam-baovao avy tamin’ny zandary dia mbola nahitana basy vita gasy teny an-tanany. Ny tompon’andraikitra teo amin’ny fokontany no nilaza tamin’ny zandary tany an-toerana ny amin’ny fisian’ity tranga ity. Nidina avy hatrany tany an-toerana ireo mpitandro filaminana nanao ny fizahana ny razana. Ary niroso avy hatrany tamin’ny fisavana ny tranony ihany koa ireto tompon’andraikitra. Tamin’izany no mbola nahitana fitaovam-piadiana toy ny basy vita gasy dimy ary ihany koa fitoeram-bala roa. Mpanao aferam-basy nifoteran’ny zavatra nataony sa niniana novonoina ? Nandeha avy hatrany ny fanadihadiana mahakasika ity tranga ity.
m.L
