#- Sambava. Roalahy nifamono noho ny resaka fandriana. Nandeha nitady asa tany amin’iny fokontany Amparihy, ao amin’ny kaominina Antsahavaribe no nifamono tao an-tranon’ny olona nandray azy ireo ny zoma alina teo. Maty tsy tra-drano noho ny tsindron’antsy nahazo azy ny iray tamin’izy roalahy ireto. Araka ny fampitam-baovao azo dia resaka fatoriana no nahatonga ny adin’izy roalah ireto. Voalaza mantsy fa kely loatra ilay fandriana natorin’izy ireo ary dia rafitra ny ady. Tonga tany an-toerana moa ireo zandary ary nisambotra ity nahavanon-doza ity.
#- Ambilobe. Doro tanety nitera-doza. Fiarabe iray no nifandona tamina fiara “minibus Mazda” tamin’iny lalam-pirenena fahenina iny teo Betsimiranjana, kaominina Marivorano, eo amin’ny PK586+300, ny faran’ny herinandro teo. Vokany olona iray no maty tsy tra-drano, efatra kosa no naratra mafy, izay samy nentina tao amin’ny hôpitaly Ambilobe avokoa. Voalaza fa vokatry ny setroka nateraka doro tanety tany an-toerana dia tsy nahita ny lalan-kombana intsony ilay fiarabe ary dia io nifandona tamin’ilay “mazda” io. Ny borigadin’ny zandary ao Ambilobe moa no misahana ny fanadihadiana.
Nangonin’i m.L