Amin’izao fotoana izao, raha ny fanadihadiana natao sy maso mahita, dia tsy mitsaha-mitombo ny isan’ ireo andriambavilanitra tonga manao ny asa fampanofana tena ao Toliara ao, ary tafaroboka hatramin’ny tovovavy tsy ampy taona tokony mbola hianatra any an-tsekoly mihitsy. Ho an’iry voalohany dia antony maro no mahatonga azy ireo hivaro-tena ka anisan’izany amin’ny ankapobeny ny fahasahiranana mahazo laka ankehitriny sy ny tsy fahavitan’ny lehilahy adidy (fisarahana tampoka amin’ny rain-janaka kanefa tsy misy asa atao ilay vehivavy, eo ihany koa ny fandosiran’ilay rain-janaka adidy amin’ny fameloman-janaka ao an-trano ka voatery ilay vehivavy no mitady ny fomba rehetra hamelomana ny ankizy). Fa ho an’ireto “ajampela” kosa dia ny fitiavam-bola mora azo malaky sy rendrarendra, . . .no manosika azy ireo hiroso amin’ity asa tranainy eto an-tany tsy andoavana hetra ity. Hita eny amoron-dalana rehetra eny, any anaty trano fandihizana, trano fandraisam-bahiny ireny, anaty ‘’bar’’, eny amoron-dramomasina sy amina “casino” sy ny maro hafa tsy voatanisa eto ireo ankizivavy ary manodidina ny 14 taona ny salan’isan’izy ireo mamandrika mpanjifa amin’ny fanomezana filana ara-nofo.
Eric Manitrisa