Toliara : Voaroba ny volamena rehetra tao an-trano, tovolahy 19 taona voatifitra

Nitrangana fanafihana mitam-basy indray tao Toliara. Jiolahy efatra mitam-basy tsy nisaron-tava nandroba tokantrano iray tao amin’ny fokontanyAndabizy, vao maraim-be tamin’ny roa ora. Raha vao tafiditra ny trano ireto jiolahy, dia nitaky vola avy hatrany. Nilaza ho tsy manana ilay raim-pianakaviana tompon-trano saoferana taksiborosy, ka notifirin’ireo jiolahy tsy nananany antra ny zanany lahy 19 taona. Niditra teo amin’ny kibony ny bala. Noho ny fahaverezan-drà be loatra dia nitolefika tsy tafatsangana intsony ity tovolahy. Raha ny loharanom-baovao akaiky ny mpitandro filaminana, dia lasan’ireo jiolahy ny volamena rehetra tao an-trano niampy finday maromaro. Mbola miady amin’ny fahafatesana hatramin’izao, manaraka fitsaboana ao amin’ny hopitalibe ity tovolahy notifirin’ireo jiolahy.
Eric Manitrisa