Lehilahy iray manodidina ny 41 taona no voatery nosamborin’ny pôlisy tao an-drenivohitr’i Bongolava tao, noho izy ity voarohirohy tamin’ny resaka fanolanana ankizivavy kely, ny faran’ny herinandro teo. Raha ny fampitam-baovao azo dia tonga nametraka fitoriana tao amin’ny biraon’ny kaomisaria tao an-drenivohitr’i Tsiroanomandidy ny vehivavy iray. Voalaza tamin’izany fa niharan’ny herisetra ara-nofo ny zanany vavy, izay vao 13 taona monja. Nandray an-tanana avy hatrany ny raharaha ireo mpanao fanadihadiana ary nanomboka izany, hikarohana izay nahavanon-doza. Tsy olona lavitra moa no noahiahiana no nahavita izany fa rangahy iray tao an-tranon’izy ireo ihany, izay tsy iza fa ny raikeliny, araka ny loharanom-baovao azo hatrany. Nosamborina ity farany ary nanaovana famotorana. Niaiky ny helony tao anatin’izany. Natolotra ny Fampanoavana ny talata lasa teo tany an-toerana ihany moa ingahirainy. Amin’ny toe-javatra tahaka izao, izay tsy andeferan’ny ireo mpitsara mihitsy, dia nampidirina am-ponja vonjimaika miandry ny fotoam-pitsaràna azy ity rangahy ity.
Na dia eo tokoa aza ny famaizana mafy ampiharina amin’ireo olona nahavanon-doza, mampihatra herisetra ara-nofo, indrindra amin’ny zaza tsy ampy taona, dia tsy mitsaha-mitombo ihany ireo olona voarohirohy noho izay resaka izay. Raha ny tany Tsiroanomandidy fotsiny izao, dia nanamarika ireo pôlisy tany an-toerana fa nisy lehilahy iray hafa naiditra am-ponja vonjimaika tamin’io andro io ihany, noho izay resaka fanolanana izay hatrany.
m.L
