Manana ny tanin-janakazony manokana koa ankehitriny ny faritra vakinankaratra. Izany no tanteraka dia noho ny fiaraha-miasa amin’ny ONG “Graine de vie” . Zanakazo 20 000 fototra no efa novokaran’ny faritra ankehitriny. Misy karazany 12 izy ireo ary efa tonga eo amin’ny fotoana tokony hambolena azy ireo zanakazo ireo amin’izao fotoana. Fotoanan’ny fambolen-kazo rahateo amin’izao ka mifanojo tsara amin’ny filana izany. Marihina fa santatry ny fiaraha-miasan’ny roa tonta ity hetsika ity ka anjaran’ny faritra no manaparitaka ireo zana-kazo ireo ho an’izay mila izany. Ny kaominina Behenjy izao no voalaza fa efa naka zanakazo 500 fototra ary misy taratasy fifanekana ho an’izay maka ireo zanakazo ireo. Tanjon’ity “pepinière”-n’ny faritra ity ny fijerevana lavitra noho ny fiovaovan’ny toe-trandro sy ny tontolo iainana, ka mba hiadiavana izany sy ho an’ny taranaka any aoriana.
Andry N.