Nirefodrefotra tsy nifandrenesana poa-basy nandritra ny fakana an-keriny nataon’ireo jiolahy nirongo fiadiana hoentina handemena ny olona, tao amin’ny tanànan’Ambolosy, any amin’ny kaominina ambanivohitra Ambakireny, disitrikan’i Tsaratanàna, aty amin’ny faritra Betsiboka ny alina Alahady faha-05 volana Febroary lasa teo, tokony ho tamin’ny 10 ora mahery 50 minitra tany ho any no nisehoan’izany. Raha ny fampitam-bavaova voarainay avy any an-toerana hatrany dia tsy nisy alaharo ireo malaso vao nigadona teo amin’ny toerana voalaza etsy ambony, fa niditra amboletra tao anatin’ny tranon’olona roa samy hafa, hanaovana fakana an-keriny, ka vehivavy miisa roa no nalain’izy ireo. Ny iray vao tanora erotrerony 17 taona monja no mpiantra ao amin’ny Ceg Ambohidronono, ny iray kosa efa manambady aman-janaka, ireo no lasibatry ny asa fakana an-keriny nataony jiolahy any amin’ny tanànan’i Ambolosy. Ny angom-baovao voaray ihany koa no nahalala, fa efa nisy nahatsikaritra 24 ora talohan’io ireo andian-dahalo am-polony, izay lavidavitra ny toerana nisehoany tranga, ary tamin’izany no efa nisy olona tsy fantatra nanao fampitahorana, fa hisy haka an-keriny ny Rain’ilay Zaza mpiantra io. Nampilaza ny manam-pahefana sy ny mpitandro ny filaminana ireo olona nahare ny feo niely teo amin’ny manodidina. Taorian’izay no nilaza ny handray ny andraikiny mpitandro ny filaminana, kanjo izao ny zava-nisy sy niseho. Marihana fa mitohy hatrany fanarahan-dia ataony Zandary sy ny vatan-dehilahy manoloana izao fakana an-keriny izao. Mbola tsy nahenoana vaovao kosa makasika ny sadam-bola hokasainy dahalo halaina amin’ireo tompokavana.
Ratantely
