Tonga nitsidika ny Sekreteram-panjakana miadidy ny zandarimariam-pirenena, ny Jly Randriamahavalisoa Girard, tao amin’ny birao fiasany tetsy Betongolo, omaly, ny masoivohon’i Inde miasa sy monina eto amintsika, Atoa Subir Dutta. Fitsidiam-piaraha-miasa izy ity, izay niompana betsaka kokoa tamin’ny lafiny fanatsarana ny fandriampahalemana eto amintsika. “Niompana tamin’ny fanamafisana ny fiaraha-miasa ho fanatsarana ny fandriampahalemana ny diniky ny roa tonta. Nodihina ihany koa ny fanampiana ara-pitaovana ho an’ny Zandarimariam-pirenena” hoy ny fampitam-baovao. Tetsy andanin’izay, “ny Sekreteram-panjakana miadidy ny Zandarimariam-pirenena, dia naneho fisaorana ny masoivohon’i Inde ary naneho ihany koa ny fahavononany hatrany hanoy ny fiaraha-miasa”. Marihina, fa tamin’ny toan-dasa dia efa nanao fitsidiham-piaraha-miasa tamin’ilay « Expo de la Défense » tany New Delhi Inde ny Sekreteram-panjakana miadidy ny Zandarimariam-pirenena. Ny governemanta Indiana, dia hanome vatsim-pianarana amin’ny karazam-piofanana 20 ho an’ny miaramila eo anivon’ny Minisiteran’ny Fiarovam-pirenena.
m.L